Սիդնեյ
Սիդնեյը բնակչության թվով Ավստրալիայի ամենախոշոր քաղաքն է: Նոր Հարավային Ուելս նահանգի վարչական և երկրի առևտրա-տնտեսական, ֆինանսական կենտրոնն է, տրանսպորտային կարևոր հանգույց, նավահանգիստ Պորտ Ջեկսոն ծոցի ափին։ Սիդնեյ է կոչվել անգլիական ներքին գործերի նախարար լորդ Սիդնիի անունով։
Սիդնեյում շատ բան կարելի է իմանալ ինչպես Ավստրալիայի պատմության, այնպես էլ ժամանակակից կյանքի մասին: Պարզապես այցելեք Սիդնեյի օպերային թատրոն, բաց մի թողեք նաև Ժամանակակից արվեստի թանգարանը, իսկ Սիդնեյ հեռուստատեսության աշտարակից բացվող քաղաքի տեսարանը անմոռանալի պահեր կպարգևի յուրաքանչյուրին:
Մելբուռն
Մելբուռն Ավստրալիայի երկրորդ խոշոր քաղաքն է, որը գտնվում է Պորտ Ֆիլիպ ծովածոցի շուրջը։ Մելբուռնը շատ հաճախ անվանում են նաև երկրի «մարզական և մշակութային մայրաքաղաք», քանի որ այնտեղ են անցկացվում Ավստրալիայի բազմաթիվ մարզական և մշակութային իրադարձությունները: 1956 թվականին Մելբուռնում են անցկացվել ամառային Օլիմպիական խաղերը: 2015 թվականին The Economist ամսագիրը հինգերորդ անգամ անընդմեջ Մելբուռն քաղաքը ճանաչել է բնակվելու համար երկրագնդի ամենահարմարավետ քաղաքը:
Բրիսբեն
Բրիսբենը Ավստրալիայի հնագույն քաղաքներից է և հիմնադրվել է Ավստրալիայի աբորիգենների կողմից։ Անվանվել է Բրիսբեն գետի անունով, որի վրա տեղակայված է, որն էլ իր հերթին անվանվել է ի պատիվ Նոր Հարավային Ուելսի նահանգապետ (1821-1825) Թոմաս Բրիսբենի անունով: Բրիսբենը հայտնի է իր հստակ Քուինսլենդյան ճարտարապետությամբ, որը կազմում է քաղաքի պատմամշակութային ժառանգությունը։ Քաղաքը համարվում է տուրիստական գրավչության վայր։
Գոլդ Քոստ
Գոլդ Քոստը համարվում է Քլիվլենդ նահանգի երկրորդ քաղաքը բնակչության թվով և վեցերորդը երկրում։ Գոլդ Քոստը հայտնի է, որպես Ավստրալիայի խոշոր տուրիստական կենտրոններից մեկը՝ ջրային տուրիզմի կենտրոն։
Պերթ
Պերթ քաղաքը հայտնի է իր մարդաշատ ծովափերով և ակտիվ գիշերային կյանքով: Կոտտեսլոն իդեալական վայր է նրանց համար, ովքեր հանգստանալու գնում են ընտանիքով: Մարդիկ այստեղ զբաղվում են լողով, սուզվելով և սերֆինգով: Ամենատարբեր կենդանիներ տեսնելու համար կարող եք այցելել Ռոտտենս կղզի, որտեղ գտնվում են նաև Արքայական և Բուսաբանական այգիները:
Ադելաիդա
Ադելաիդա քաղաքը հիմնադրվել է 1836-ին Անգլիայի թագավոր Ուիլյամ IV-ի օրոք և կոչվել նրա կնոջ անունով։ Ներկայումս այս քաղաքում է գտնվում Կլիլանդ այգին, որը հայտնի է իր կոալաներով: Այստեղ կան նաև շատ թանգարաններ և պատկերասրահներ: Սպորտի սիրահարները անպայման կցանկանան այցելել Ադելաիդա Օվալ պատմական մարզադաշտ:
Կանբերրա
Կանբերրան հանդիսանում է Ավստրալիայի ամենամեծ քաղաքը, որը գտնվում է մայրցամաքի ներսում, այլ ոչ ծովափին։ Հատուկ ստեղծվել է որպես մայրաքաղաք, որի կառուցումն սկսվել է 1913-ին։ 1927-ից խորհրդարանի և կառավարության նստավայրն է։ Կանբերրան սկզբնապես եղել է Մոլոնգլո գետի մի հատվածի անվանումը, որը դարձել է և տեղանքի անվանումը։
Կերնս
Կերնսը տրոպիկական քաղաք է Ավստրալիայում: Թե՛ տեղացիները, թե՛ զբոսաշրջիները օգտվում են Կերնսի հանրահայտ արհեստական լագունից, քանի որ այստեղ կարող են լողալ և հանգստանալ, անգամ պիկնիկ կազմակերպել: Կերնսում շատ են առևտրի կենտրոնները, կինոթատրոնները, սրճարանները, ավստրալական ավանդական փաբերը, ինչպես նաև բարերը, գիշերային ակումբներն ու հոսթելները: Քաղաքին շատ մոտ են Ֆլեկեր բուսաբանական այգին և Կերնսի «անձրևային» անտառը:
